Според член 117 од Законот за заштита на природата (Сл. Весник на РМ 67/04), заштитата на пределската разновидност се обезбедува преку „зачувување на карактеристичните обележја на пределот, како и одржувањето на биолошките, геолошките и културните вредности кои го одредуваат неговото значење и естетското доживување“.

Според тоа, целите кои се однесуваат на клучните екосистеми и видови во Паркот, односно мерките и активностите за нивно постигнување ќе имаат директно или индиректно влијание врз пределот во Паркот. Сепак, преку заштитата на елементите на пределот само делумно се придонесува за неговата заштита. Вредностите и квалитетите на пределот во Паркот се должат и на распоредот и меѓусебната комбинација на неговите составни елементи.

При пропишување на мерките и активностите за заштитата на пределот во Националниот парк Пелистер неопходно е да се имаат предвид човековите влијанија, но и природните процеси. Од човековите активности кои можат да ги нарушат вредностите на пределот во Паркот најзначајна е изградбата на инфраструктурни објекти (градби, патишта, патеки и друга инфраструктура за посетителите и др.). Пожарите исто така можат да предизвикаат сериозни нарушувања во пределот во Паркот. Некои промени во социо-економските текови во потесното и поширокото општествено опкружување исто така можат да резултираат со неповолни промени во пределот. Така на пример, поради напуштање на традиционалниот начин на стопанисување и демографските промени, земјоделските површини, ливадите и традиционалните пасишта во околината на селото Маловишта, речиси се пред  исчезнување. Овие елементи на пределот имале значајна еколошка функција, но придонесувале и за естетските квалитети на овој дел од пределот. Што се однесува до природните фактори, пределот може да биде нарушен поради ширење на штетници на големи површини, снегоизвали, ветроизвали и сукцесија на биоценозите. Типичен пример за ваквите процеси е обраснувањето на камените реки и пасиштата поради ширење на моликовите шуми. 

Врз основа на дискусијата погоре и поаѓајќи од Визијата за Паркот, управувањето со пределот во Националниот парк Пелистер според овој План ги има следните цели:

ü      Пределот и понатаму е мозаик од природни шуми, традиционални пасишта, леднички езера и други водни екосистеми, камени реки и други геоморфолошки формации. Културните елементи на пределот поврзани со селото Маловишта се со зачуван традиционален изглед и го надополнуваат мозаикот на пределот во Паркот;

ü      Натамошната урбанизација на земјиштето е органичена и инфраструктурните објекти се со размер, дизајн и местоположба што не го нарушуваат природниот карактер на Паркот.

Мерки и активности:

-        Усвоен е нов План за просторно уредување на Паркот;

-        Согласно новиот План за просторно уредување на Паркот изготвени се детални урбанистички планови со кои се регулираат активностите за реставрација и реконструкција на постојните објекти и изграба на нова инфраструктура и објекти на начин што дозволува незначително влијание врз пределот.

Како што беше спомнато во дискусијата погоре, заштитата на пределот во Паркот исто така ќе зависи од спроведувањето на мерките и активностите поврзани со   заштитата на неговите клучни екосистеми и мерките за поддршка на социо-економскиот развој на локалните заедници, пред сé локалната заедница на село Маловиште. Покрај нив, за заштитата на пределот се релевантни и мерките и активностите за контрола на пожари, штетници и загадувањето но и другите мерки поврзани со унапредување на капацитетот за управување со Паркот