1.1.                        Програма за научно-истражувачка дејност во Паркот

Управата ќе изготви „Програма за научно-истражувачка“ дејност во Паркот која ќе ги дефинира приоритетите и условите под кои ќе се спроведуваат истражувањата. Оваа програма треба да послужи како инструмент со кој Управата ќе ја поттикнува (но не и ограничува) научно-истражувачката работа која е во функција на постигнување на целите на овој План за управување. Оваа програма ќе се ревидира согласно наодите од студиите предвидени со овој План како и мониторинг програмата.   

1.2.                        Мониторинг на биодиверзитетот и животната средина во Националниот парк Пелистер

Изработката и спроведувањето на „Програма за мониторинг на биолошката разновидност и животната средина“ во Националниот парк Пелистер изискуваат значително време и напор. Програмата за мониторинг треба да се испланира внимателно со цел истата да даде одговори на поставените прашања на ефикасен начин, т.е. да се соберат вистинските податоци со вложување на најмали трошоци и напор. Во основа, со изготвувањето и спроведувањето на програмата за мониторинг се има за цел да:

се спроведат серија на меѓусебно поврзани набљудувања и анализи, а со цел да се установи дали специфичните цели за биолошката разновидност (клучните вредности) во Паркот се постигнати.

Клучно за успехот на програмата е да се има јасно дефинирани цели за заштита на биолошката разновидност во Паркот. Преку определување на клучните особености во Паркот, определувањето на постојната состојба на секоја од нив и поставувањето на цели за постигнување на посакуваната состојба, овој предуслов е во голема мерка исполнет. Сепак, за соодветно дефинирање на состојбата на компонентите на биолошката разновидност потребна е цела низа на податоци. Треба да се има предвид дека за некои од клучните вредности од биолошката разновидност во текот на изработката на овој План сепак не беа достапни доволно податоци. Оттука проценката на нивната состојба и определувањето на целите за истата може да се покажат како несоодветни. Од тие причини, меѓу приоритетите на овој План ќе биде да се спроведат соодветни студии (види Поглавје 5) кои во голема мерка ќе го помогнат и насочат процесот на дизајнирање на програмата за мониторинг.

Покрај мониторинг на параметрите со кои се определува/опишува состојбата на клучните вредности во Паркот (биолошката разновидност), мониторинг програмата треба да вклучи и параметри со кои ќе се следи дали целите за одговор кон притисоците кон овие вредности се постигнати, како и за тоа дали спроведувањето на соодветните мерки и стратегии било доследно. На тој начин, мониторинг програмата ќе опфати параметри многу пошироки и поразновидни од оние со кои се определува состојбата на биолошката разновидност во Паркот. Со формирањето на „Советодавното тело на Националниот парк Пелистер“ и другите мерки и активности пропишани во Поглавје 8.2., ќе се обезбеди учество на засегнатите страни во мониторинг програмата, односно во оценка на резултатите од спроведувањето на мерките и активностите пропишани со овој План.

Во рамките на мониторинг програмата исто така детално ќе се разработат потребите и техничките решенија за чување, пристап и користење на податоци (пр. GIS систем со бази на податоци и сл.).